બાલાસિનોરમાં પીઆઈ પર કાર ચઢાવી દેવાનો પ્રયાસ કરી ફરાર થઈ ગયેલા ચાર આરોપીઓ સામે બાલાસિનોર ટાઉન પોલીસ મથકે ચાર શખ્સો સામે ફરિયાદ નોંધાઈ હતી. ફરાર થઈ ગયેલા ચાર આરોપીઓ પૈકી બે બુટલેગરોને મહીસાગર એલસીબી ટીમે રાજસ્થાનના ખેરવાડા પાસેથી ઝડપી પાડીને લુણાવાડા લોકલ ક્રાઈમ બ્રાન્ચ ખાતે લાવી કાયદેસર કાર્યવાહી હાથ ધરી છે.
જેની વિગત અંગે બાલાસિનોરની કે.એમ.જી. હોસ્પિટલ પાસે હોળીની રાત્રે બાલાસિનોર ટાઉન પોલીસ મથકના પીઆઈ પર બુટલેગરોએ હુમલો કરીને કાર ચઢાવી દેવાનો પ્રયાસ કર્યો હતો. ત્યારે પીઆઈ ખસી જતાં બચી ગયા હતા પરંતુ ચાર શખ્સો નાસી છુટયા હતા.જે અંગે મહીસાગર જિલ્લા લોકલ ક્રાઈમ બ્રાન્ચે તપાસ હાથ ધરી હતી. જેમાં હુમલો કરનાર બે બુટલેગર વિક્રમભાઈ સોમાભાઈ માલીવાડ (રહે. મોટા ભાગલિયા, તા. કડાણા) અને મનીષભાઈ જગદીશભાઈ મહેરા (રહે. કંથરજીના મુવાડા, તા. બાલાસિનોર) રાજસ્થાનના ડુંગરપુર જિલ્લાના ખેરવાડા પાસે હોવાની બાતમી એલસીબીને મળી હતી. જેના આધારે એલસીબીએ દરોડો કરી ખેરવાડા પાસેથી બે આરોપીઓને ઝડપી પાડી લુણાવાડા લોકલ ક્રાઈમ બ્રાન્ચ ખાતે લાવી કાયદેસર કાર્યવાહી હાથ ધરી છે.
