નવી દિલ્હીઃ ભારતે 2-0થી લીડ મેળવીને ન્યૂઝીલેન્ડ સામેની ODI શ્રેણી જીતી લીધી છે. ભારત તરફથી પ્રથમ આક્રમક બોલિંગ જોવા મળી હતી. જે બાદ બેટ્સમેનોએ પણ શાનદાર પ્રદર્શન કર્યું હતું. ભારતે બીજી વનડેમાં કિવી ટીમને 8 વિકેટે હરાવ્યું છે. ટીમ ઇન્ડિયાએ 179 બોલ બાકી રહેતા મેચ જીતી લીધી હતી. સીરીઝ જીત્યા બાદ ટીમ ઈન્ડિયાએ એક રેકોર્ડ પણ પોતાના નામે કરી લીધો છે.
ટીમ ઈન્ડિયાએ 2019માં ઘરઆંગણે એક પણ વનડે શ્રેણીમાં હારનો સામનો કરવો પડ્યો નથી. આ શ્રેણીમાં ભારતની આ સતત સાતમી જીત છે. અગાઉ, 2016 થી 2018 સુધી, ભારતે 6 વનડે શ્રેણી જીતી હતી. તે પછી 2018 થી 2020 સુધી પણ ટીમ ઈન્ડિયાએ 6 સીરીઝ જીતી. પરંતુ આ વખતે ભારતે આ રેકોર્ડને પાછળ છોડી દીધો છે અને 2019થી ઘરઆંગણે 7 વનડે શ્રેણી જીતી છે.
મોહમ્મદ શમી મેચનો હીરો રહ્યો હતો
ટીમ ઈન્ડિયા તરફથી શાનદાર બોલિંગ જોવા મળી હતી. આ મેચનો હીરો અનુભવી બોલર મોહમ્મદ શમી હતો. તેણે ઓપનર ફિન એલનને શરૂઆતની ઓવરમાં જ શૂન્ય પર આઉટ કર્યો હતો. જે બાદ પંડ્યા અને સિરાજે પણ વિરોધી ટીમ પર વર્ચસ્વ જમાવ્યું હતું. આ સાથે જ શમીએ વધુ બે મહત્વના બેટ્સમેનોને પેવેલિયનનો રસ્તો બતાવ્યો હતો. તેમના સિવાય સ્ટાર ઓલરાઉન્ડર હાર્દિક પંડ્યા અને વોશિંગ્ટન સુંદરે 2-2 સફળતા મેળવી હતી.
રોહિત શર્માએ શાનદાર ઇનિંગ રમી હતી
ભારતીય કેપ્ટન રોહિત શર્માએ ટીમને સારી શરૂઆત અપાવી હતી. હિટમેને 7 ચોગ્ગા અને 2 છગ્ગાની મદદથી 51 રનની શાનદાર ઇનિંગ રમી હતી. આ સાથે જ યુવા બેટ્સમેન શુભમન ગીલે પણ 40 રન બનાવ્યા હતા. બંને ટીમો વચ્ચે શ્રેણીની છેલ્લી વનડે 23 જાન્યુઆરીએ રમાશે.
ઇન્ટરનેશનલ ક્રિકેટ કાઉન્સિલ (ICC) છેલ્લા કેટલાક સમયથી લોસ એન્જલસ 2028 ઓલિમ્પિક ગેમ્સમાં સામેલ થવામાં રસ દાખવી રહી છે. કાઉન્સિલે ટી20 ટૂર્નામેન્ટ માટે આયોજક સમિતિને કુલ 6 ટીમોની ભલામણ કરી છે. જેમાં પુરુષ અને મહિલા બંને ટીમનો સમાવેશ થાય છે. માર્ચ 2023 સુધીમાં આયોજકો દ્વારા નવી રમતોની યાદી તૈયાર કરવામાં આવશે.
જોકે, આ મુદ્દે અંતિમ નિર્ણય IOC સત્રમાં લેવામાં આવશે. જે ઓક્ટોબર 2023માં થવાની આશા છે. આ બાબતને લઈને એવી અટકળો ચાલી રહી હતી કે ક્રિકેટ 2028 ઓલિમ્પિકમાંથી બહાર થઈ ગયું છે. પરંતુ ESPN Cricinfo ના રિપોર્ટ પરથી માનવામાં આવી રહ્યું છે કે આ મુદ્દે હજુ સુધી કોઈ નિર્ણય લેવામાં આવ્યો નથી. આ નિર્ણય અંગે ઓક્ટોબરમાં મુંબઈમાં બેઠક યોજાશે.