આંકલાવ તાલુકાના ભેટાસી બા-ભાગમાં રહેતા ખેડૂતના પત્નીનું અવસાન થતાં પિયરપક્ષ ગામડીની જમીનમાં તેનું નામ નિકળ્યું હતું. આ જમીન પચાવી પાડવા ગામડીના માથાભારે શખ્સે આ ખેડૂત અને તેના પુત્રને લઇ જઇ નડિયાદ ખાતે 15 દિવસ ગોંધી રાખ્યાં હતાં. આ અંગે આંકલાવ પોલીસે ત્રણ શખ્સ સામે ગુનો નોંધ્યો હતો.
આંકલાવ તાલુકાના ભેટાસી ગામે રહેતા એક યુવકની પત્નીનું અવસાન થતા સાસરીમાં પત્નીના ભાગે આવતી જમીનમાં પોતાનું અને પોતાના બે દીકરાઓનું નામ ચઢાવવા બાબતે નડિયાદના એક શખસ સાથે વાતચીત કર્યા બાદ આ કામ તેને ન સોંપતા શખસે એક મહિલા સહિત ત્રણ સાથે મળીને 21મી ફેબ્રુઆરી,24ના સાંજના ચંદ્રસિંહ અને તેમનો નાનો પુત્ર ધીરૂ ઉર્ફે પ્રકાશ બન્ને ઘરે હતાં તે સમયે હારૂન દિવાન ઘરે આવ્યો હતો અને આણંદ જવાનું છે. તમારા પત્નીના ભાગમાં આવતી ગામડીની જમીનમાં તમારૂ અને તમારા બન્ને દિકરાનું નામ ચડાવવાના છે. જેથી આણંદ મારી સાથે ચાલો. તેમ કહેતા ચંદ્રસિંહે તેમના સાળા મહેન્દ્ર ગોહેલ સાથે વાતચીત થઇ ગઇ છે અને તેઓ અમારૂ નામ ચડાવવાના છે. તેમ કહેતા હારૂન ઉશ્કેરાઇ ગયો હતો અને અપશબ્દ બોલી ધમકી આપી ગાડીમાં બેસાડી દીધાં હતાં. તેનું અપહરણ કરી 15 દિવસ સુધી ગોંધી રાખ્યા હતા. આ મામલે આંકલાવ પોલીસે ત્રણેય વિરૂદ્ધ ગુનો નોંધી તેમને ઝડપી પાડવા ચક્રો ગતિમાન કર્યા હતા, ત્યાં બીજી તરફ ત્રણેય જણાં ધરપકડથી બચવા માટે ભૂગર્ભમાં ઉતરી ગયા હતા. મુખ્ય સુત્રધાર એવો હારૂનશા દિવાન ભાજપનો કાર્યકર નીકળ્યો છે.
આંકલાવ તાલુકાના ભેટાસી (બા) ભાગ કાકવાળા ફળીયામાં રહેતા 42 વર્ષીય ચંદ્રસિંહ લક્ષ્મણસિંહ પરમારના પત્નીનું અવસાન થતા તેમની સાસરીમાંથી મળેલી જમીનમાં તેમનું અને તેમના બે પુત્રના નામ ચઢાવવા મામલે તેમણે નડિયાદના હારુનશા દિવાનને કામ સોંપ્યું હતું. જોકે, પછીથી તેમણે કામ તેમના સાળા મારફતે કરાવતા આ બાબતની રીસ રાખીને હારૂનશા દિવાને ચંદ્રસિંહ પરમાર તથા તેમના પુત્ર ધીરૂનું કારમાં બેસાડી અપહરણ કર્યું હતું અને તેમને નડિયાદ સ્થિત વખતપુરા ગામે રહેતા શેફાલી પિયુષ ક્રિશ્ચનના ઘરે લઈ ગયા હતા. જ્યાં શેફાલીબેનના ભાઈ વિશાલે તેમને રૂમમાં 15 દિવસ સુધી ગોંધી રાખ્યા હતા. અને જમીનનું કામકાજ તેમની પાસે કરાવવા મારી નાંખવાની ધમકીઓ આપી હતી.
